رسالة من عشوائي - بص لي

سلامو عليكو انا واحد من الناس اللي تحت خالص وعايشة معاكم في نفس البلد اللي هي مصر. انا عارف انكم عارفين اني انا وامثالي موجودين وعادة لما تيجي سيرتنا بيجيلكم واحد من شعورين ١. شعور بالقرف من جهلنا و القباحة اللي بنمثلها بالنسبة لكم ٢. شعور بالخوف اللي بيوصل لحالة رعب من اننا يوم نقوم عليكم ونهاجمكم ونعتدي عليكم الحقيقة ان الشعورين مبررين وانا مش هاحاول اني الومكم انكم عندكم المشاعر دي لكن انا عايز اوصل لكم كم من نقطة كده تاخدوها في اعتباركم وانتم الاكابر بتوعنا اللي فاهمين ومتعلمين وبالذات انكم قادرين تتناقشوا في مستقبل البلد وشاغلين نفسكم بحاجات كتيرة وكبيرة احنا اصلا مش فاهمينها. انا قلت اسمعكم صوتي وصوت اللي زي يمكن تدلكم وتساعدكم وانتم بتتكلموا مع بعض ١. اول حاجة احب اوضحها ان احنا لما بنصحا الصبح بنبقي مركزين علي اننا نقدر نعدي اليوم علي خير. "علي خير" دي بتشمل حاجات كتيرة زي مثلا اننا نقدر نجيب اكل يكفينا احنا واللي احنا ملزمين بيهم - انا سمعت انكم بتجيبوا الاكل بالاسبوع وتحطوه في الديب فريزر وده طبعا احد احلامنا وعلشان مانبقاش طماعين ممكن الحلم نختصره ان يبقي عندنا اكل النهاردة وبكره لأننا ماعندناش تلاجة ولا ديب فريزر ٢. اليوم الكويس بالنسبة لنا بيكون لما يعدي من غير اهانة من حد وفي امان من غير ما ابني يضرب ولا انا اتاخد تحري علشان شكلي مش ولابد. بالمناسبة بخصوص شكلي انا نفس استحما كل يوم واغير هدومي كمان بس احنا لا عندنا مية حلوة ولا صرف وبالنسبة للهدوم ارجو الرجوع للنقطة اللي فوق اننا يادوب لاقيين ناكل  ٣. بالنسبة للجهل فده حاجة اتفرضت علينا وعمرنا ما اخترناها. لما رحنا المدرسة كنا كتير قوي في الفصل فمفهمناش حاجة وكان المدرس طلعان عينه زينا وماعندوش سبب يعلمنا وكان بيطلع زهقه علي انا واصحابي ضرب وبسرعة اهالينا احتاجونا نساعدهم نلم الفتات علشان نعرف نعيش؛ الكلام ده طبعا للي راحوا مننا المدرسة لأن كتير مننا ماخدوش الفرصة دي من اساسه ٤. لما بيجيلنا والعياذ بالله مرض موضوع العلاج ده بيبقي صعب شوية والدكتور اللي يشوفنا عادة حالته زي المدرس اللي بيدرسنا: مطحون وقرفان وايده مربوطة. اتصوروا ان ساعات مابنقدرش نجيب الدوا لأن برضه كتير مابنقدرش نجور علي اكل بقية العيلة فبنستحمل المرض علشان نتجنب الجوع ٥. اما موضوع البلطجية اللي مننا فاحب انبهكم اننا بنعاني منهم اكتر منكم لأنهم بيبتدوا بينا قبل ما يوصلوا لكم. يعني احنا حقل تجاربهم واتصوروا انكم ممكن ماتبقوش قادرين توصلوا بيوتكم علشان بلطجي شارب ولا ضارب قرر ان ماحدش هايعدي. لكن ارجو انكم تعرفوا ان اغلبيتنا علي الفطرة وطيبيين وعايزين نعيش في حالنا طيب من كل اللي قلته ده احب اوصل لكم ان كتير مننا ماعندوش حلم (الا حلم عشا الليلة دي) وعلشان كده بنفكر في آخرتنا لأن  الدنيا من الواضح انها مش هاتبقي وردي بالنسبة لنا. علشان كده وعلي اد مخنا بنتجاوب مع اللي بيكلمونا عن ربنا والجنة وده بيخلينا متقبلين شوية الل احنا مضطرين نعيش فيه. ولما تيجي الانتخابات (وده موسم) بنقبل نبيع صوتنا لأن ده بيخلينا مرتاحين يومين وساعات اسبوع واظن ان ده مايخليقوش تهاجمونا وتقرفوا منا القرف ده كله علي فكرة لما قامت الثورة وعلي قد مخنا حاسينا اننا هانطلع من الذل اللي احنا عايشينه كل يوم ولكن من ساعتها لدلوقتي مش حاسين بأي فرق؛ ورجعنا تاني للطحن ورجعنا تاني مش فارق معانا الا ان اليوم يعدي علي خير. بس كانوا يومين حلوين اللي رجع لنا فيهم الامل ولكن كأنك ياابوزيد ماغزيت واحمد طلع زي الحاج احمد والا احنا يمكن مش فاهمين او يجوز طماعين شوية اللي عايز اقوله لكم يا باشوات وهوانم ان المشكلة بتاعتنا مش الليبراليه ولا المدنية ولا الكلام الكبير قوي اللي انتم شاغلين نفسكو بيه. المشكلة ازاي هاترجعونا الي عالم البني آدمين علشان نقدر نحلم زيكم وبعدين ولادنا لما يتعلموا يبقوا يقرروا ان كانوا عايزين يبقوا ليبراليين ولا احرار ديموقراطيين ؛ دول ولادنا ممكن حتي في يوم من الايام لما يتعلموا كده كويس ان شاء الله يهتموا بحقوق الحيوان زي ماانتم بتعملوا: قادر يا كريم نفسي اشوف او اسمع حد بيعمل خطة تخليني اقدر احلم من تاني. أي حلم علي فكرة: غير اني احلم باكلة كويسة  ممكن اسألكم ولو فيها بجاحة : هو انتم بتحلموا بإيه؟ والسلام امانة